كيفية عمل المحارة وانواعها بالتفصيل
بوص يا سيدى انا هفهمك يعنى ايه محارة من الالف الى الياء .. ركز بقا معايا عشان دى خلاصة المرمطة والشحططة والجرى و الكحرطة ( لازم تتمرمط عشان تتعلم)
المحارة اللى هى برده ( البياض ) دى اول خطوة بتم فى مرحلة النص تشطيب بعد التاسييس ودى بقا مرحلة مهمة جدا جدا جدا لإن لو اتعملت صح اى حاجة بعديها هتبقا صح ولو ظهر فيها عيوب مفيش اى حاجة تقدر تداريها .. عشان كدا دايما لما تشتكى من مشكلة عندك فى شكل الحيطة النقاش يرد عليك ويقولك ده عيب محارة ..
طيب يعنى ايه محارة !!!
ببساطة المحارة دى خلطة من اسمنت ورملة ومية بيتخلطوا على بعض بنسب معينة تعملنا مونة ونبتدى نغطى بيها طبقة الطوب
طيب ليه بنعمل محارة اصلا
اولا عشان نظبط الحوائط مع ارض وسقف وزوايا
طيب هو سمك المحارة ده المفروض يبقا اد ايه
قوانين البناء الهندسية قالت ان المفروض الطبيعى يبقا ٢.٥ سم .. بس خد بالك ده الطبيعى .. لكن اوقات كتير بتبقا الحوائط مش مظبوطة وبنضطر نربى مونة وفى الحالة دى لازم نلبش الحيطة الاول وبعدين نربى المونة بتاعتنا
طيب وهى المحارة دى ليها انواع ولا لا
انواع مين والناس نايمين يا حاج ( عبيله واديله .. خمر وارميله )
طبعا ده كلام مقاولين ملناش دعوة بيه 😂😂
انواع المحارة
اولا : محارة بالادة او محارة على دراع
وده نوعين فى دراع عادى وفى دراع نضيف
وده نوع بدائى لتنفيذ المحارة ورخيص الى حد ما بالنسبة لانواع المحارة التانية والفرق بين الدراع العادى والدراع النضيف .. هو ان الدراع العادى ده المشهور عند المقاولين وهو ده اللى قولتلك عليه فوق بتاع عبيله واديله وده بيتسلم حيطة حيطة وعادى وانت ماشى فى سكتك تلاقى مطب فى السقف ولا تلاقى لمؤاخذة الاسمنت شقق او تلاقى حتة وحتة واطية ( يا رااااجل كبر مخك😁😁😁😁 )
الدراع النضيف احسن شوية لان بنعمل تتبع مع نقط الابواب والشبابيك والكمرات مع الاعمدة وهكذا وده بنفذه مع طبقة التشطيب المتوسطة عشان يبقا مش غالى وفى نفس الوقت يقضى الغرض
ثانيا : المحارة على وتر
ودى بتتنفذ بطريقين ياما بنصب اوتار على طول .. يا اما بنصب بوج ونشد عليها خيوط ودى بتطلع المحارة مظبوطة جدا وبتحس ان الشقة متشطبة وجاهزة وهى لسه على المحارة كدا ( اه والمصحف😊😊 )
ودى عيبها انها غالية بس متنساش ان دايما الغالى تمنه فيه 😉😉
نيجى بقا للنوع التالت وهو تاكيس وتربيع وبوج واوتار
وده شغل عالى عالى عالى يعنى بس ده مش بينفذ الا فى الاماكن المهمة وفى نفس ذات الوقت واسعة جدا والمساحة كبيرة فبنضطر نرمى نقط فى الاتجاهين ونرفع الاكسات وناكس ونربع وهكذا ودى غاليه جدا جدا مش بس كدا ده مش اى صنايعى يشتغلها
طيب خطوات تنفيذ المحارة ازاى يا هندسة 😀
قولتى ازاى .. قولتلى ازااااااى .. اقولك انا 😎
اول حاجة بنعملها بنطرطش الحوائط والسقف وبعدين ندق السلك ( وده عندنا فى مصر .. فى دول تانية زى الكويت بيدقوا السلك الاول وبعدين يطرطشوا ) مفيش مشكلة كله حلو ( ياختشى كدا ينفع وكدا ينفع )
بنيجى بعد كدا لتنفيذ المحارة بالنوع اللى يعجبك والوضع المادى اللى يناسبك
وعلى فكرة سلك الفواصل فيه منه معدن وفى منه فايبر .. لو انت فى مصر هيقولك فايبر لو فى الخليج هيقولك المعدن احسن .. انا شخصيا بفضل الفايبر
نسيت اقولك ان قبل تنفيذ مرحلة المحارة لازم تكون مركب حلوق الابواب ولو خايف عليها يا عم ابقا غطيهااااااا😂😂 .. وابقى غطى وشك انت كمان عشان الصنايعى حافظ مش فاهم 😁😁
بالنسبة للحمام والمطبخ مش بيتمحر متبقاش غبى 😂👊
يلا انا كدا خلصت سلام عليكووووووو
#منة_هندس_يامعلم
انت فنان
ردحذفا) تمام عايزين بقي خطوات التاكيس والتربيع يعني مجرد تصميم كده لفله مثلا تعرض فيه ازاي تاكس يا معلم ازااي وايه هيه الاكس يعني كاك في كام بدينا كام يا معلم كان معكم وا بلاش
ردحذف